Փաշինյանը վերջին շրջանում դարձել է արևմտյան դեսպանների սիրելի հյուրը

Վարչապետի պաշտոնը զբաղեցնող Նիկոլ Փաշինյանը վերջին շրջանում դարձել է արևմտյան դեսպանների սիրելի հյուրը։ Նա բավականին ակտիվ հանդիպումներ է ունենում տարբեր դեսպանների հետ, բնականաբար առանց այդ տեղեկությունները հրապարակայնացնելու, կամ որևէ կերպ այդ մասին մարդկանց տեղեկացնելու։

Արևմտյան երկրների դեսպանների սիրելի հյուրն, այժմ էլ դարձել է Հայաստանում ԱՄՆ դեսպան Քրիստինա Քվինի հաճախորդը։ Նախորդ ուրբաթ երեկոյան, նա ընտանիքով հյուրընկալել է ԱՄՆ դեսպանին և երկար ժամանակ անցկացրել նրա տանը։ Ըստ էության, հաճելին համատեղել են օգտակարի հետ, կերել, խմել, խոսել տարբեր՝ այդ թվում քաղաքական թեմաներով։ Այս այցի վերաբերյալ որևէ տեղեկություն չկա, հայտնի չէ, թե ինչի մասին են զրուցել, սակայն դատելով Նիկոլ Փաշինյանի և նրա թիմի վերջին շրջանի ելույթներից, մեսիջներից և հակառուսական տրամադրություններից, Արևմուտքի նկատմամբ ակնհայտ լոյալությունից, պարզ է, որ հարաբերություններն ամերիկացիների հետ սերտանում են և ոչ միայն ֆորմալ բնույթի են, այլ նաև ոչ ֆորմալ չափազանց՝ ջերմ։

Միացյալ Նահանգները գործի է դրել իր փափուկ ուժը, գործող վարչախմբին ամբողջությամբ իր տրամադրության տակ անցկացնելու և այդ կերպ հարցեր լուծելու։ Չի բացառվում, որ Արևմուտքն որոշակի կոմպրոմատներ կարող է ունենալ Փաշինյանի ու նրա թիմակիցների դեմ, դրանք ևս օգտագործելով իրեն հարկավոր քաղաքական միավորները վաստակելու համար։ Ցանկացած պարագայում դա լրջագույն խնդիր է դառնալու Հայաստանի Հանրապետության համար, ինչը, թերևս, բնավ չի մտհոգում Նիկոլ Փաշինյանին։ Նա լուծում է սեփական իշխանությունն ամեն գնով պահպանելու հարցը։ 

Արմեն Սարիբեկյան