ՊԵԿ նախագահը հյուրընկալել է Իրանի նախագահի խորհրդականին. անդրադարձել են Մեղրի-Նորդուզ անցակետերի միջեւ ծագող խնդիրներին

ՀՀ պետական եկամուտների կոմիտեի նախագահ Ռուստամ Բադասյանն օգոստոսի 25-ին ընդունել է Իրանի Իսլամական Հանրապետության նախագահի խորհրդական, ԻԻՀ ազատ գոտիների գերագույն խորհրդի քարտուղար Հոջաթոլլահ Աբդոլմալեքիի գլխավորած պատվիրակությանը։ Այս մասին NEWS.am-ը տեղեկանում է ՊԵԿ տեղեկատվության եւ հասարակայնության հետ կապերի բաժնից:

Հանդիպման ընթացքում կողմերը քննարկել են երկկողմ համագործակցության հետագա զարգացմանն ուղղված մի շարք հարցեր։ Մասնավորապես, անդրադարձել են Մեղրի-Նորդուզ սահմանային անցակետերի միջեւ ծագող խնդիրների արագ եւ արդյունավետ լուծմանը միտված մեխանիզմներին, բեռնատարների համար երկիր մուտք գործելու տուրքի զրոյացման հնարավորությանը, ինչպես նաեւ տեղեկատվության էլեկտրոնային փոխանակման գործընթացն առավել իրատեսական դարձնելու հարցերին։

ԻԻՀ նախագահի խորհրդական, ազատ գոտիների գերագույն խորհրդի քարտուղար Հոջաթոլլահ Աբդոլմալեքին ընդգծել է Հայաստանի Հանրապետության եւ Իրանի Իսլամական Հանրապետության մաքսային մարմինների միջեւ սերտ համագործակցության կարեւորությունը՝ երկու երկրների միջեւ փոխադարձ առեւտրի, ապրանքաշրջանառության ծավալների մեծացման խթանման, ինչպես նաեւ հայ-իրանական տնտեսական համագործակցության զարգացման համատեքստում։

Քննարկման արդյունքում պայմանավորվածություն է ձեռք բերվել հետեւողականորեն շարունակել աշխատանքային հանդիպումները՝ առարկայական արդյունքներ արձանագրելու նպատակով։

Հանդիպման ավարտին կողմերը վերահաստատել են փոխադարձ պատրաստակամությունը՝ մաքսային ոլորտում հայ-իրանական համագործակցությունն ընդլայնելու հարցում։