Ամենակարևորը ճիշտ ժամանակին, արժանապատիվ և բարձունքում սպորտից հեռանալն է․ Նազիկ Ավդալյանը՝ Հռիփսիմե Խուրշուդյանին

Ծանրամարտի աշխարհի, Եվրպոյի բազմակի չեմպիոն Նազիկ Ավդալյանը ֆեյսբուքյան գրառմամաբ արձագանքել է Եվրոպայի առաջնությունից բրոնզե մեդալով վերադարձած ու կարիերան ավարտելու մասին հայտարարած Հռիփսիմե Խուրշուդյանին.

«Հռիփս ջան, հասկանում եմ, թե ինչքան դժվար է սպորտը թողնելը՝ հեռանալ մի աշխարհից, որտեղ  քո խոսքը ասելու  համար խաղասեղանին է դրվել ամեն ինչ, առանց բացառության՝ ընտանիք, շրջապատ,  ժամանց,  առողջություն, երեխա, ժամանակ… իսկ արդյունքում կարող ես ստանալ ամեն ինչ կամ ոչինչ։

Չնայած այս ամենին՝ գալիս է այն ցավալի պահը, երբ ստիպված ես լինում որոշում կայացնել սպորտից դուրս գալու, բայց ամենակարևորը ճիշտ ժամանակին, արժանապատիվ և բարձունքում սպորտից հեռանալն է, ինչը ցավոք ոչ բոլոր մարզիկներին է հաջողվում, իսկ քեզ հաջողվեց, ինչի համար ես իրոք հպարտանում եմ քեզանով։

Սիրում եմ քեզ շատ և ցանկանում եմ բազում հաջողություններ ու ձեռքբերումներ այն ճանապարհին, որը դու այսուհետ կընտրես քեզ համար»։