Պետդումայում ծաղրել են Եվրամիությանն անդամակցելու Հայաստանի ցանկությունը. «Ծիրան են մտածել»
ՔԱՂԱՔԱԿԱՆՈՒԹՅՈՒՆ
Եվրամիությունը փորձում է «արդուկել» իրեն միանալ ցանկացող Հայաստանի «ուղեղը», news.ru-ին տված հարցազրույցում ասել է Պետդումայի պաշտպանության կոմիտեի նախագահի առաջին տեղակալ Ալեքսեյ Ժուրավլևը։ Նրա խոսքով, բոլորն են հիանալի հասկանում, որ Հայաստանը երբեք չի դառնա ԵՄ անդամ, բայց նրանք փորձում են Հայաստանին լարել Ռուսաստանի դեմ։
«Ինչպես ավանակ-Ուկրաինայի համար գազարը, այնպես էլ Հայաստանի համար մտածվել է ծիրանը, որը կախելով կարթից կարելի է այդ երկիրը տանել ցանկացած ուղղությամբ։ Եվ բոլորը հիանալի հասկանում են, որ Կովկասը երբեք չի մտնի Եվրամիություն, բայց դա անընդհատ կկրկնեն որպես հմայություն հայերին հիմարացնելու և հակառուսական դարձնելու համար»,- ասել է Ժուրավլևը։
Նա ընդգծել է, որ նման իրավիճակ եղել է 2014 թվականին, երբ Ուկրաինան սկսեցին մեր աչքի առաջ վերածել «ագրեսիվ հակառուսական հրեշի»։ Ինչպես նշել է պատգամավորը, այժմ Կիևի ռեսուրսները սպառվել են, և, ամենայն հավանականությամբ, նրան փոխարինող է ընտրվել Երևանը։
«Վստահ եմ, որ հայերի համար «ՆԱՏՕ» բառը շուտով կհայտնվի ԵՄ ղեկավարության խոստումների մեջ որպես հերթական հրապուրանք, որը, սակայն, կարող է տանել միայն դեպի անդունդ։ Ափսոս, որ Հայաստանի քաղաքացիները դա դեռ չեն հասկանում, իսկ երբ հասկանան՝ շատ ուշ կլինի»,- հավելել է Ժուրավլևը։
Ավելի վաղ սենատոր Սերգեյ Ցեկովը հայտարարել էր, որ Հայաստանի կողմից Եվրամիություն մտնելու համար հայտարարված ստորագրահավաքը ոչ պիտանի իրադարձություն է։ Ըստ նրա Երևանը միայն լրացուցիչ գումարներ է ծախսելու դրա վրա, քանի որ հենց ԵՄ-ն չի ցանկանում Հայաստանին տեսնել իր կազմում:
Նյութը հրապարակման պատրաստեց Կամո Խաչիկյանը
