ՀՀ-ում զբոսաշրջիկներին տեղափոխող ավտոբուսների համար նոր պահանջ կգործի
ՀԱՍԱՐԱԿՈՒԹՅՈՒՆ
Հայաստանում զբոսաշրջային ծառայություններ մատուցող ավտոբուսները գործունեություն իրականացնելու համար պարտավորված կլինեն հատուկ հավաստագիր ստանալ։ Այս մասին այսօր ասուլիսի ժամանակ հայտնեց Զբոսաշրջային կոմիտեի նախագահ Լուսինե Գևորգյանը` նշելով, որ սա արվում է զբոսաշրջային ծառայությունների մատուցման կանոնների ու պահանջների խստացման շրջանակում։
Խստացված կանոններ կգործեն նաև զբոսավարների համար։ Նրանք մինչև հավաստագիր ստանալը պարտավորված կլինեն անցնել դասընթացներ, այնուհետև հանձնել գրավոր քննություններ` հայոց լեզու, հայոց պատմություն և կրոնի պատմություն առարկաններից։ Ինչից հետո էլ կլինի բանավոր քննություն հատուկ ստեղծված հանձնաժողովի առաջ։
Գևորգյանը հիշեցրեց, որ ոլորտի թվայնացման շրջանակում կստեղծվեն էլեկտրոնային զբոսաշրջային գրանցամատյաններ, որոնցում կգրանցվեն զբոսաշրջային օպերատորները, գործակալները, տրանսպորտը, գիդերը, և ոլորտն ավելի վերահսկելի կդառնա։
«Այն սուբյեկտները, որոնք գրանցված կլինեն այս հարթակում, կունենան պետության համապատասխան հավաստագիր, այսպես ասած «նույնականացում» կանցնեն, ու նրանց ծառայություններից օգտվողներն արդեն կիմանան, որ ստուգված ծառայությունից են օգտվում։ Բայց սա պետք չէ խառնել լիցենզավորման հետ, քանի որ կոմիտեն լիցենզավորող մարմին չէ»,– ասաց Լուսինե Գևորգյանը։
Նոր փոփոխություններով նախատեսվում է նաև պարտադիր դարձնել կայք ունենալը, որպեսզի անբարեխիղճ տնտեսվարողը սոցիալական ցանցում մեկ էջ բացելով չկարողանա ծառայություններ մատուցել։
Ըստ Գևորգյանի` Հայաստանում խնդիր է նաև զբոսաշրջիկների ու ծառայություն մատուցողների միջև պայմանագիր չկնքելու վատ պրակտիկան։ Սա նույնպես շուտով կկարգավորվի օրենքով։ Զբոսաշրջային ծառայություն մատուցողը պարտավոր կլինի ունենալ ապահովագրություն, որպեսզի զբոսաշրջիկը ֆորսմաժորային իրավիճակներում երաշխիքներ ունենա։
