Թրամփը ստորագրել է հրաման, որով անգլերենը ճանաչվում է որպես Միացյալ Նահանգների պաշտոնական լեզու
ՄԻՋԱԶԳԱՅԻՆ
ԱՄՆ նախագահ Դոնալդ Թրամփը հրամանագիր է ստորագրել անգլերենը որպես Միացյալ Նահանգների պաշտոնական լեզու ճանաչելու մասին։ Փաստաթղթի տեքստը շաբաթ օրը տարածել է Սպիտակ տան մամուլի ծառայությունը։
«Մեր պատմական կառավարող փաստաթղթերը, այդ թվում՝ Անկախության հռչակագիրը և Սահմանադրությունը, գրվել են անգլերենով, հետևաբար, վաղուց էր պահանջվում անգլերենը հռչակել Միացյալ Նահանգների պաշտոնական լեզու», – նշվում է հրամանագրի տեքստում։
Հրամանագիրը նաև ուժը կորցրած է ճանաչում 2000 թվականի փաստաթուղթը՝ բարելավելու ծառայությունների հասանելիությունը անգլերենի սահմանափակ իմացություն ունեցող անձանց համար:
ԱՄՆ մարդահամարի բյուրոյի տվյալներով՝ ամերիկացիների ավելի քան 78%-ը խոսում է միայն անգլերեն։ Այնուամենայնիվ, միլիոնավոր ամերիկացի քաղաքացիներ և մարդիկ, ովքեր տեղափոխվել են ԱՄՆ, խոսում են նաև այլ լեզուներով, ինչպիսիք են վիետնամերենը, իսպաներենը և չինարենը: Օրինակ՝ իսպաներենն առաջին լեզուն է երկրի բնակչության մոտ 13%-ի համար։
