Կենտրոնացած էի լավ նվագելու, հաճույք ստանալու և հաճույք պարգևելու վրա. «Արմենիա» միջազգային մրցույթի հաղթող

Panorama.am-ը գրում է.

Դաշնակահարուհի Հռիփսիմե Աղաքարյանը «Արմենիա» միջազգային մրցույթի առաջին մրցանակակիրն է։ Նա հաղթող է ճանաչվել 14 երկրի 48 մասնակիցներից։ Հռիփսիմեն ավարտել է Երևանի պետական կոնսերվատորիան, այժմ աշխատում է Սարյանի անվան արվեստի դպրոցում և կոնսերվատորիայում։

Դաշնամուր նվագում է վեց տարեկանից։ Panorama.am-ին Հռիփսիմեն պատմեց, որ մայրը նույնպես դաշնակահար է և նրան լսելով՝ միշտ ցանկացել է ինքն էլ շարունակել մայրիկի գործը։ 

«Արմենիա» մրցույթին մասնակցելու կասկածներ է ունեցել, մի քանի անգամ որոշել է մասնակցել ու հրաժարվել որոշումից, ի վերջո, վերջնական որոշում է կայացրել և դարձել մրցույթի հաղթող։

Ելույթի ծրագիրն ընտրել է ըստ իր նախասիրությունների՝ այն, ինչ ցանկացել է նվագել:

«Գուցե ներկայացրածս ստեղծագործությունները ժամանակաշրջաններով և ոճերով մոտ էին իրար, սակայն դա այն էր, ինչ ես ուզում էի նվագել՝ Ռավել, Սկրյաբին, Շոստակովիչ, Ռախմանինով և Շորի ստեղծագործությունները (վերջինները ծրագրում պարտադիր էին)։ Մենահամերգի նման ստացվեց։ Հաղթանակ, ճիշտն ասած, չէի սպասում։ Ես ուղղակի մտածում էի իմ ելույթի մասին, ուրիչ ոչինչ։ Կենտրոնացած էի միայն լավ նվագելու, հաճույք ստանալու և հաճույք պարգևելու վրա»,- ասում է Հռիփսիմե Աղաքարյանը։

Դաշնակահարուհին իր մրցակիցներից շատերին լսել է և նշում է, որ նրանց կատարողական մակարդակը շատ բարձր էր։

Դաշնակահարուհին ասում է, որ զրուցել է ժյուրիի անդամների հետ, նրանք ասել են, որ իր  մեջ գնահատել են հատկապես կատարման անկեղծությունը։

Շարունակությունն՝ այստեղ.