Ամեն օր անարդարություն է․ մարդիկ ուզում են իմանալ իրենց երեխան կենդանի՞ է, թե ոչ, մարդկանց մոտ ահավոր վիճակ է․ Աշոտ Ղազարյան
ՄՇԱԿՈՒՅԹ
Իմ տղան մեկ-երկու ժամ ուշանում է, տնից արդեն անհանգստանում ենք, այս մարդիկ ամսից ավելի է՝ սպասում են իրենց երեխաներից որևէ լուր լսեն, դաժան է, շատ դժվար է, դա է ինձ այստեղ բերել՝ դիմել միջազգային կառույցներին, որ գոնե նրանք մի բանով կարողանան օգնել: Այս մասին Երևանի Շառլ Ազնավուրի հրապարակում լրագրողների հետ զրույցում ասաց դերասան Աշոտ Ղազարյանը:
«Ախր ամեն օր անարդարություն է, այս մարդիկ ասում են՝ գոնե իմանանք մեր երեխան կենդանի՞ է, թե՝ ոչ, մարդկանց մոտ ահավոր վիճակ է, հետները զրուցել եմ: Ես էլ չեմ կարողանում քնել, դաժան բան է այն մարդու համար, ով այս հողին ու ջրին կպած է, ով այստեղ է ծնվել, մեծացել, դժվար է այս ամենը, դաժան է»,- ասաց նա:
Հարցին՝ հույս չկա՞, որ իշխանությունները հարցը կլուծեն, նա պատասխանեց. «Ինչ, որ անում ենք, քաղաքական չէ, անհետ կորած երեխեքի համար է, ինչ ասեմ՝ իշխանությունը շատ բան պետք է անի, բայց այդ մարդիկ լռում են: Ես քաղաքականություն կյանքում չեմ սիրել, չեմ հասկանում, սրան մասնակցում եմ, որ գոնե մի բան կարողանանք անել»,- նշեց Աշոտ Ղազարյանը:
Հիշեցնենք, որ արվեստագետները Երևանի Շառլ Ազնավուրի անվան հրապարակից քայլերթով գնալու են Ֆրանսիայի դեսպանատուն։ Երթի նպատակն է աջակցել զինվորների և զինծառայողների հարազատներին և իրենց ձայնը հասցնել միջազգային բոլոր հեղինակավոր կառույցներին։
Երեկ էլ մտավորականները Ազատության հրապարակից երթով գնացել էին դեպի ՌԴ դեսպանատուն և հանձնել նամակ, որում Ռուսաստանին խնդրում են աջակցել հայ գերիների և անհետ կորածներին վերադարձնելու հարցում:
