Հրավիրում եմ իմ հանդիսատեսին Mezzo ակումբ՝ վայելելու լավ երաժշտություն
ՄՇԱԿՈՒՅԹ
Օրերս Հայաստան է ժամանել Ամերիկայի ProjectOne հայտնի խմբի մենակատար Գուրգեն Գալստյանը։ Չնայած նրան, որ երգիչը կարճ ժամանակով է այցելել հայրենիք, սակայն հասցրել են համերգ կազմակերպել։ Համերգը տեղի կունենա այսօր՝ ապրիլի 19-ին ժամը 21։00-ին MEZZO ակումբում։ 1or.am կայքը զրուցել է խմբի մենակատար Գուրգեն Գալստյանի հետ։
Պարոն Գալստյան, ե՞րբ զգացիք, որ ձեր տարերքը երաժշտությունն է:
— Երաժշտությունն ինձ համար ի վերուստ տրված պարգև է։ Առաջին հերթին շնորհակալ եմ հորս, որ, չորս տարեկանից սկսած, ինձ մոտ ճիշտ ճաշակ է ձևավորել։ Հետագայում, երբ հասկացա, որ երաժշտությունն իմ տարերքն է արդեն ինը տարեկան էի և սկսեցի հաճախել Սայաթ Նովայի անվան երաժշտական դպրոց։ Այնտեղ պարապելու ընթացքում հասկանում էի, որ ինձ մոտ ավելի հեշտ է ստացվում այն ամենն ինչ մյուս աշակերտների համար ավելի դժվար էր։ Եվ այդ ժամանակ ես համոզվեցի, որ իսկապես երաժշտությունն է իմ տարերքը։
Կպատմե՞ք այն մասին, թե ինչպե՞ս ձևավորվեց ProjectOne-ը
— ProjectOne խումբը ձևավորվեց իմ ընկեր Արտակ Մարտիրոսյանի և իմ շնորհիվ։ Խումբը ձևավորվեց, քանի որ Լոս Անջելեսում հայկական համայնքի համար երաժշտական ասպարեզում լճացում էր և մեր նշանակետը այն էր, որ փորձեինք հայկական միջավայրից որոշ չափով վերացնել այդ ցածրորակ երաժշտությունը։ Կարծում եմ, որ դա մեզ հաջողվել է, և մենք անընդհատ փորձում ենք առաջ գնալ և այնպես անել, որ հնարավորինս քիչ հնչի այդ թուրքա-ադրբեջանական երաժշտությունը, որը որ թարգմանված է հայերեն բառերով։
Կա՞ն խոչընդոտներ, որոնք հաղթահարել եք խմբի կայացման փուլերում:
— Խոչընդոտներ, իհարկե, կան, որոշները արդեն հաղթահարել ենք իսկ որոշներն էլ հաղթահարման ճանապարհին են։ Այդ խոչընդոտներից մեկը այն էր, որ այն ցածրորակ երաժշտությունը պրոպագանդողները բավականին բարձր էին վարձատրվում ոչնչի համար և մենք այդ խոչընդոտները փորձեցինք հաղթահարել մեր ելույթները լավագույն տեղերում կազմակերպելու համար, որ հասարակությունը լսի մեզ և տեսնի, թե իրականում որն է բարձրորակ երաժշտությունը։ Նաև չեմ կարող չնշել մեր խմբի երաժիշտների բարձր պրոֆեսիոնալիզմի մասին, որը նաև վկայում է բենդի բարձր որակի մասին։
- Ո՞րն է ձեր լսարանը: Ո՞ր տարիքի երաժշտասերներն են մեծամասամբ այցելում ձեր համերգներին:
Մեր լսարանը շատ տարբեր է, հիմնականում 24 տարեկանից սկսած մինչև հիմնականում 60 տարեկանները։ Սկզբնական շրջանում մեր հիմնական լսարանը 24-ից 45 տարեկան աղջիկներն ու կանայք էին հետո լսարանը ավելի լայնացավ և դարձան այն մարդիկ, ովքեր որ կարոտ էին այդ երաժշտությանը և այդ երաժշտությունը նրանց պատանեկության շրջանն էր հիշեցնում և նրանց մոտ առաջացնում էր նոր հուշեր և այդ հուշերը իրենց տանում էր դեպի երիտասարդություն։
Դուք կարճ ժամանակով եք այցելել Հայաստան և արդեն նախատեսված համերգ ունեք, ի՞նչ ծրագրերով եք եկել Հայաստան։
— Այո, ցավոք սրտի, շատ կարճ ժամանակով եմ այցելել Հայաստան։ Հիմնականում ամեն տարի գալիս եմ և հիմնականում գարնանն եմ գալիս, քանի որ սիրում եմ գարունը Երևանում անցկացնել, երևանյան գարունն ինձ համար չնաշխարհիկ է։ Կարճ ժամանակով եմ եկել, քանի որ բենդի հետ կապված նոր պլաններ կան ԱՄՆ-ում և, ցավոք, երկար մնալ չեմ կարող, չնայած, որ կարոտում եմ։ Ամեն դեպքում հնարավոր է նոր այցելություններ լինեն։ Ինչ վերաբերում է համերգին, ապա այն ի սկզբանե նախատեսած չէր, բայց քանի որ այս կարճ ժամանակահատվածում այսպես ստացվեց և հայտնվեցի Երևանում Արտակը այսպիսի լավ անակնկալ արեց ինձ և մեր բենդին։ Իրականում շատ լավ երաժիշտներ են հավաքվել այսօրվա համերգին, որը կայանալու է Mezzo ակումբում և ծրագրում լինելու է միայն բարձրորակ երաժշտություն և ճիշտ երաժշտություն, որը որ ինքն իրենով թելադրում է գեղագիտական ճաշակ։
Սոնա Գիշյան
