44-օրյա պատերազմի հիման վրա ստեղծված «#44» ներկայացման պրիեմերան տեղի կունենա Մայիսի 6-ին
ՄՇԱԿՈՒՅԹ
Մայիսի 6-ին ժամը 21։00-ին Երևանի դրամատիկական թատրոնում տեղի կունենա 44- օրյա պատերազմի հիման վրա ստեղծված «#44» ներկայացումը։
1or.am կայքը այս թեմայով զրուցել է ներկայացման ստեղծագործական խմբի անդամներից Արման Ջուլհակյանի հետ։
-Պարոն Ջուլհակյան, ի՞նչ ներկայացում է, ինչպե՞ս է ստեղծվել։
- Ներկայացումը ստեղծվել է 44-օրյա պատերազմի հիման վրա։ Պարային ներկայացում է, որը տեղի է ունենալու մայիսի 6-ին ժամը 21։00-ին դրամատիկական թատրոնում։ Ներկայացումը ունենալու է նաև օնլայն հեռարձակում` ամբողջ աշխարհով մեկ և այն մարդիկ, ովքեր երկրում չեն կարող են նաև օնլայն դիտել։ Ներկայացման տևողությունը 44 րոպե է, բայց դա իրականում նախապես մտածված չի եղել և երբ մենք ավարտել ենք ներկայացումը, տեսել ենք, որ ամբողջ տևողությունը 44 րոպե է։
-Ո՞րն է ներկայացման բովանդակությունը և հետաքրքրությունը։
-Ներկայացման բովանդակությունը այն է, որ կա մի ժողովուրդ, որը ապրում, ստեղծում և արարում է կուրորեն և իր հայրենիքի, իր հողերի համար ամեն ինչի պատրաստ է։ Եվ մարդկանց աչքերը բացվում են այն ժամանակ, երբ իրենք ունենում են կորուստ։ Ներկայացման հետաքրքրությունն այն է, որ ամբողջ ներկայացման ընթացքում բոլոր արտիստների աչքերը կապված են և նրանք հենց կապված աչքերով են պարում, միայն ներկայացման վերջում է բոլորի աչքերը բացվում։ Եվ դա իր մեջ շատ խորը իմաստ ունի այն առումով, որ մարդիկ պետք է մտածեն կյանքում ավելի սթափ լինելու մասին և ավելի ուշադիր լինեն։
-Ովքեր են ձեր թիմի անդամները և ում աջակցությամբ եք ստեղծել ներկայացումը:
-Ներկայացման ֆինանսական աջակցությունը եղել է Սփյուռքում ապրող մեր հայրենակիցների կողմից։ Այն մարդիկ, ովքեր պատերազմի ողջ 44-օրվա ընթացքում ջանք և ֆինանս չեն խնայել օգնելու համար, ֆինանսավորել են նաև այս ներկայացումը ստեղծելու համար, թատրոնի վարձակալությունը, բաններները, հագուստը այդ ամբողջը իրենց ֆինանսավորմամբ է եղել։ Եվ այդ ամենը մեզ շատ հայտնի, շատ սիրելի Անրի Վերնոյի որդի Պատրիկ Մալաքյանն է, մեր լավագույն ընկերներից Յան Ֆրանչեսկինն է` իր կնոջ Անահիտ Կալուջիանն է, մեր շատ լավ ընկեր Ստեփան Ավետիսյանը և Միքայել Վեմիանը, ովքեր մեծ կապ ունեն արվեստի հետ։ Եվ հիմա ամենահուզականը այն է, որ Պատրիկ Մալաքյանը իր կնոջ և Յան Ֆրանչեսկին իր կնոջ հետ, հատուկ եկել են այս ներկայացման պրեմիերային գտնվելու համար։ Մարդիկ կտրելով հազարավոր կիլոմետրեր և այդ համավարակի դժվար ժամանակներում, նրանք նախ աջակցում են մեզ, որ արվեստը չկորցնի իր ուժը նաև գալիս են, որ ներկա գտնվեն այդ ամենին։
Ներկայացումը ստեղծել ենք ես՝ որպես բալետմաստեր, Արա Ասատուրյանը՝ որպես բալետմաստեր, Գրիգոր Խաչատրյանը՝ որպես ռեժիսոր, Մելինե Առաքելյանը՝ որպես մենապարուհի և փորձավար, մեր տնօրենը Այդա Անդրեասյանը, մենք նաև ունենք աջակիցներ ընկերներ՝ «Վարարակ» կազմակերպությունը և «Էբոնի» կազմակերպությունը, ովքեր աջակցում են մեզ պարային ներկայացումը օնլայն հեռարձակելու համար։ Եվ մեր ամբողջ թիմը շնորհակալություն է հայտնում բոլոր այն մարդկանց, ովքեր աջակցում են մեզ և օգնում են այս դժվարին պայմաններում, որովհետև երկու բնական և արհեստական աղետների ժամանակ ստեղծել արվեստ, ստեղծել ներկայացում` կարծում եմ շատ դժվար է։ Եվ ես շատ եմ ցանկանում, որ նման տեսակի մարդիկ լինեն ամբողջ աշխարհով մեկ։ Խումբը Մայր Աթոռ Սուրբ Էջմիածնի և Նորքի Հայորդաց Տան «Նարեկ» պարային համույթն է, որը 2015 թվականից սկսած անում է մի շարք պարային ներկայացումներ ոչ միայն Հայաստանում, այլ ներկայացումների պրեմիերաները արտերկրներում են եղել՝ Նյու Յորք, Ֆրանսիա, Ստամբուլ և սա մեր թվով 8-րդ պարային ներկայացումն է։
Սոնա Գիշյան
