Լավրովը Հնդկաստանի արտգործնախարարի հետ քննարկել է Պակիստանի հետ հարաբերությունների լարվածությանն առնչվող հարցեր

Ռուսաստանի և Հնդկաստանի արտաքին գործերի նախարարներ Սերգեյ Լավրովը և Սուբրամանյամ Ջայշանկարը հեռախոսազրույցի ժամանակ քննարկել են Հնդկաստանի և Պակիստանի միջև վատթարացող հարաբերությունները, հայտնում է Ռուսաստանի արտաքին գործերի նախարարությունը։

«Արտաքին քաղաքականության գերատեսչությունների ղեկավարները քննարկել են ռուս-հնդկական համագործակցության արդիական հարցերը, ինչպես նաև հնդկա-պակիստանյան հարաբերությունների սրումը Փահալգամ քաղաքի մոտ տեղի ունեցած ահաբեկչական հարձակումից հետո», - ասվում է նախարարության կայքում հրապարակված հայտարարության մեջ։

Արտաքին գործերի նախարարությունը նշել է, որ Լավրովը կոչ է արել Նյու Դելիի և Իսլամաբադի իշխանությունների միջև տարաձայնությունները կարգավորել քաղաքական և դիվանագիտական ​​միջոցներով՝ երկկողմանի հիմքերով՝ համաձայն 1972 թվականի Սիմլայի համաձայնագրի և 1999 թվականի Լահորի հռչակագրի դրույթների։